Neptun shton emrin e tij pranë atij të Tiranës, klubit historik të basketbollit për meshkuj!

Neptun vazhdon të tregojë angazhimin ndaj komunitetit, sportit dhe sportit të basketbollit në veçanti duke u bërë sponsor gjeneral i skuadrës së basketbollit për meshkuj të Tiranës.

Në takimin që u mbajt në zyrat e Bashkisë të Tiranës, kryetari i bashkisë Z. Erion Veliaj shprehu mirënjohjen e tij për kompaninë Neptun për ndihmën që po I jep sportit të basketbollit. Ai theksoi se edhe pse fokusi nga shteti është në rritje, përsëri është e domosdoshme ndihma e biznesit për ta fuqizuar këtë sport duke i ofruar ndihmën e nevojshme ekonomike që do ta shtyjë atë përpara.

Edhe drejtori i përgjithshëm i kompanisë Neptun Z. Alexander Kosenas, e vlerësoi mundësinë për të patur emrin e Neptun pranë atij të një skuadre historike sic është Tirana në sportin e basketbollit për meshkuj. Ai falenderoi stafin menaxhues të klubit dhe bashkinë e Tiranës për këtë partneritet dhe shprehu dëshirën që edhe kompani të tjera në sektorin privat të ndjekin shembullin e Neptun për të çuar përpara sportin e bukur të basketbollit.

- “Të gjithë së bashku do ja dalim të rikthejmë entuziasmin e fëmijëve, familjeve dhe sportdashësve të basketbollit”, u shpreh Z. Kosenas gjatë fjalimit të tij.

Pjestarët e skuadrës të cilët mbajnë tashmë me krenari emrin Tirana Neptun në bluzat e tyre, ishin po ashtu të pranishëm në këtë takim. Përfaqësuesi i tyre falenderoi Neptun dhe Bashkinë e TIranës për mbështetjen. Ai solli në vëmendje se mungesa e fondeve është faktori kryesor që e ka frenuar jo vetëm këtë sport por edhe sportet e tjera për tu zhvilluar dhe për të rritur nivelin dhe shprehu bindjen se kjo ndihmë do të përkthehej me fitore në fund të sezonit.

Neptun, është përsëri i pari që hedh hapin në krijimin e një traditë që në botë dhe kryesisht në Amerikë (ku ky sport është shumë i ndjekur), është shumë e përhapur. Sa herë që do të shikojmë djemtë e ekipit të Tiranës në fushën e basketbollit, do të shikojmë edhe emrin Neptun. Kjo është një zgjedhje jo e rastësishme sepse sporti e loja e ekipit reflekton edhe disa nga vlerat kryesore të kompanisë Neptun sic janë puna në skuadër, pasioni, e përpjekjet për të arritur më të mirën.  Me përqafimin e këtyre vlerave jemi të bindur që fitoren e kemi në dorë si kompania, ashtu edhe skuadra që mban tashmë emrin Tirana Neptun.