Ju tashmë i keni hasur: 5 mitet që qarkullojnë për larjen dhe tharjen e rrobave
Para 10 viteve askush nuk e mendonte se teknologjia e lavatriçeve dhe tharëseve do të përmirësohej aq shumë sa do të revolucionarizonte kujdesin ndaj veshjeve dhe rrobave të të gjithë shtëpisë.
Ndërkohë që sot shihet si e zakonshme që një lavatriçe të rregullojë lëvizjet që të lajë butësisht veshjet delicate apo që një tharëse të kuptojë se sa të lagura janë rrobat dhe të zgjedhë programin me kohëzgjatjen e duhur.
Kjo do të thotë që ato këshilla që kanë qarkulluar më parë në lidhje me kujdesin ndaj rrobave tani janë kthyer në mite. Kjo pasi nëse keni një pajisje të re për larjen dhe tharjen e rrobave dhe vazhdoni të ndiqni këto këshilla të vjetra do të thotë që po nënvlerësoni aftësitë e pajisjes suaj.
Po cilat janë këto mite?
Miti Nr. 1: Nëse i lani rrobat në 30 gradë ato nuk lahen mirë
Përkundrazi, programet e larjes në 30 gradë në makinat larëse të fundit janë po aq efektive sa larja me 60 gradë në një të vjetër. Një nga arsyet kryesore është se lavatriçet e fundit janë ndërtuar të tilla, pra që të punojnë efektivisht në temperatura të ulta në programet e tyre ekologjike. Për të qënë më të sigurtë, një aleat i mirë është edhe detergjenti. Detergjentët e kohëve moderne mund të lajnë në mënyrë të përsosur edhe në ujë të ftohtë.
Kështu nëse ju përdorni vazhdimisht një program larje me 60 gradë e vetmja gjë që po bëni është shpenzimi i kotë i energjisë elektrike. Ajo që duhet të bëni është të zgjidhni një program me temperaturë më të ulët duke kursyer deri në 35% energji dhe të mbroni gjithashtu edhe lavatriçen tuaj.
Miti Nr 2: Nëse nuk e mbushni plot lavatriçen atëherë uji dhe energjia shkojnë kot
Ky rregull mund të vlejë për lavatriçet e vjetra të cilat nuk kanë sensorë të peshës. Një pajisje moderne e pajisur me sensorë të cilët “kuptojnë” se sa rroba janë në brenda, rregullon sasinë e ujit që i nevojitet si dhe të energjisë elektrike në mënyrë që të rregullojë konsumin sipas sasisë së rrobave.
Këto sensorë krijojnë fleksibilitet duke lejuar që rrobat të lahen kur është nevoja dhe jo kur koshi është plot. Kështu ju mund të lani veshjet tuaja të preferuara pa asnjë pengesë edhe nëse ato janë pak.
Miti Nr. 3: Sa më shumë detergjent të shtoni aq më të pastra do të jenë rrobat pas larjes
Në fakt e vërtetë është e kundërta, sepse nëse ju përdorni më shumë detergjent se sa ai i këshilluar gjasat do jenë që ai nuk do shplahet mirë dhe do të lërë shenja në rroba. Kjo pjesë shtesë gjithashtu do të mblidhet në pajisje deri sa në njëfarë pike ajo do të vijë erë e keqe.
Detergjenti është i vështirë për tu tretur dhe prandaj përdorimi i tepruar e vështirëson pastrimin. Për këtë arsye lavatriçet e sotme modern e hollojnë me ujë detergjentin para se të bashkohet me rrobat për të siguruar pastrim të plotë.
Miti Nr. 4: Tharësja nuk është e mirë për copat delikate
Në tharëset e vjetra, vetëm veshjet e trasha shkonin në tharëse ndërsa ato të mëndafshit hapeshin jashtë. Duhet të dini se pajisjet moderne janë të përshatshme edhe për copat delikate dhe nëse tharësja juaj e re ka programe të dedikuara për lloje të ndryshme copash të jeni të sigurtë se ato do të jenë të mbrojtura dhe nuk do të dëmtohen.
Një nga arsyet kryesore është se tharëset e gjeneratës së re thajnë me ajër jo shumë të nxehtë ndryshe nga ato të vjetrat. Gjithashtu ato kanë sensorë që sigurojnë që nxehja nuk do të jetë asnjëherë e tepruar. Kjo do të thotë se tharja nuk do të ketë asnjë impakt negativ në formën dhe ngjyrat e copës.
Miti Nr. 5: Rrobat e sapo lara kërkojnë më shumë kohë për tu hekurosur.
Për ata që nuk e pëlqejnë fare hekurosjen, lavatriçet e reja që lajnë më e avull do ta ulin shumë kohën për këtë punë të mundimshme. Kjo ndodh pasi në fund të procesit të larjes ato çlirojnë avull i cili penetron thellë në fibrat e rrobave duke i shkriftuar ato dhe duke reduktuar rrudhat.
Kështu, në disa makina larëse, falë larjes me avull, rrobat dalin 35-50% më pak të rrudhosura. Në fakt duke qënë se avulli gjithashtu i sterilizon copat, sipas disa kompanive, ka raste kur rrobat mund të mos kenë fare nevojë për tu hekurosur.
