Frutat e verës

Ato janë plot ngjyra, të ëmbla dhe me lëng. Janë ideale për të mundur vapën dhe plot me vlera ushqyese. Ju cilin preferoni më shumë?

Shalqi

Fruti më i madh i verës ju ofron freski dhe hidraton organizmin tuaj. Në 100 gr të këtij fruit ka 21 kalori, nga të cilat 5.3 gr janë karbohidrate dhe pjesa tjetër prej 94gr është ujë. Ai përmban gjithashtu antikosidantë, vitaminat A dhe C, Hekur, Kalcium, Kalium dhe Natrium.

Ruajtja: Kur është i paprerë mund ta mbani jashtë frigoriferit. Kur e prisni duhet ta mbani në frigorifer të mbështjellë me qese plastike. Nëse e prisni në feta mund ta ruani në një tas me kapak ku nuk hyn ajri 1-2 ditë maksimumi.

Si mund ta përdorni ndryshe: Ju mund ta shtoni në sallata të ndryshme ashtu sic shtoni domaten si dhe në sallatat e frutave. Në traditën tonë ai konsumohet edhe me bukë e djathë të bardhë. Sigurisht që mund të konsumohet edhe si lëng, smoothie apo sorbet. Mos harroni edhe lëkurën, më të cilën mund të bëjmë likonë e mrekullueshme të shalqirit.

Pjepër

Pjeprin, rivalin e shalqirit e gjejmë në treg në shumë varietete dhe ngjyra dhe sa herë që e blejmë urojmë që të na dalë i ëmbël dhe jo si kungull. Në çdo rast në 100 gr të këtij fruit ne do të marrim 21 kalori nga të cilat 5 gr janë karbohidrate, 94.2 gr janë ujë dhe 0.9 gr fibra. Ka vitaminë C dhe B-Karoten dhe është e pasur me Kalium. 

Ruajtja: Kur është i paprerë mund ta mbani jashtë frigoriferit. Kur e prisni duhet ta mbani në frigorifer të mbështjellë me qese plastike. Nëse e prisni në feta mund ta ruani në një tas me kapak ku nuk hyn ajri 1-2 ditë maksimumi.

Si mund ta përdorni ndryshe:  Pjepri shkon shumë mirë nëse shtohet në sallata të ndryshme. Gjithashtu kombinimi me proshutën krudo është i pakrahasueshëm.

Qershi

Qershitë i gjejmë në treg në periudhën Maj-Korrik. Ato kanë 47 kalori për 100 gr, nga të cilat 11.9 gr janë karbohidrate, 81.5 gr ujë dhe 1.7 gr fiber. Përmbajnë vitamina A, B dhe C, Kalium, Kalcium, Fosfor, Hekur, Magnez dhe Bakër, antioksidantë dhe janë të pasur me fitosterolet që ndihmojnë në uljen e kolesterolit në gjak.

Si mund të përdoren ndryshe: Mund të shtohen në sallatat e frutave dhe të përdoren gjerësisht në ëmbëlsira. Me to bëhet reçel shumë i mirë që mund të përdoret për tarta por mund të përdoren edhe për akullore e sorbete.  

Pjeshkët dhe nektarinat

Pjeshkët plot lëng dhe nektarinat janë një nga frutat më tipike të verës dhe gjejmë në treg në madhësi e varietete të ndryshme. Çdo 100 gr na jep 37-50 kalori, nga të cilat  9.1 gr janë karbohidrate, 86.2 gr ujë dhe 1.4 gr fiber.  Pjeshkët janë të pasura me vitamina (kryesisht C dhe E) si dhe me elementë të tjerë si Kaliumi, Kalciumi, Fosfori, Hekuri, Magnezi, etj).

Si mund të përdoren ndryshe: Përveç si komposto, marmalatë apo recel, pjeshkët janë shumë të shijshme edhe kur piqen në zgarë. Ato shërbejnë si bazë për smoothie, tartë me pjeshkë, kek e krem pasticerie.  .

 Kajsitë

Varietet e ndryshme na ofrojnë përmasa dhe larmishmëri të ngjyrës portokalli. Për 100 gr ato ofrojnë 48 calories nga të cilat 6.7 gr  janë karbohidrate, 86.6 gr ujë dhe 2.1 gr fibra. Kajsitë përmbajnë vitamina A dhe C, shumë minerale dhe B-karoten.

Si mund të përdoren ndryshe: Përveçëse mund të përdoren në sallata të ndryshme frutash, me to mund të pregatitet reçel për të lëpurë gishtat. Edhe bërthama e tyre përdoret për të bërë liker.

Rrush

Gjatë verës tregu mbushet me llojet e ndryshme të rrushit. Neve na mbetet vetëm të zgjedhim se cili na pëlqen më shumë. Në 100gr rrush ka 63 kalori, nga të cilat 9.5 gr janë karbohidrate, 84.6 gr ujë dhe 2.5 gr fibra. Rrushi përmban vitaminat A, B, C dhe E si dhe elemente dhe minerale të shumta si Kaliumi, Kalciumi, Fosfori, Hekuri, Magnezi etj.  

Si mund të përdoret ndryshe: Përveç në sallatat e freskëta, rrushin e shtojmë edhe në pjatat e mishit dhe perimeve. Përdoren gjerësisht edhe në ëmëlsira si tarta dhe kek të ndryshëm dhe lëngu i tyre mund të përdoret edhe si zëvenësues për sheqerin. Rrushi përdoret edhe në formën e thatë dhe sigurisht për të prodhuar verën dhe pijen tradicionale të rakisë. 

Fik

Fiku e ka kohën e tij në fund të verës dhe është një nga frutat e preferuar. Një kokërr fiku mesatar ka 68 kalori dhe përmban vitaminat A, B dhe C si dhe shumë minerale. 

Ruajtja:  Është mirë që fiku të ruhet në frigorifer dhe kur të shkoni për të blerë kujdesuni që të zgjidhni fiq të mbushur dhe me lëkurë të shkëlqyeshme.

Si mund të përdoret ndryshe: ne mund ti shtojmë fiqtë në sallata të ndryshme por ata janë shumë të shijshëm edhe të gatuar në grilë ose furrë me përbërës të ndryshëm përfhsirë edhe mishin e pulën si dhe me proshuta. Reçeli i tyre është shumë i shijshëm dhe përdoret gjerësisht në kuzhinën tonë. Mos të harrojmë edhe fiqtë e thatë, të cilët preferohen shumë sidomos gjatë stinës së dimrit.

Dardhë

Në mes të verës fillojnë të bëhen dardhat. Fillimisht dalin varietetet me kokrra të vogla dhe më pas ato më të mëdha. Dardhat sigurojnë 58 kalori për 100 gram dhe kanë shumë vitamin C dhe elementë e minerale të ndryshme si Hekur, Kalcium dhe Natrium.

Si mund të përdoret ndryshe:  Dardhat shkojnë mrekullisht me djathrat që kanë shije të fortë dhe mishin e ftohtë. Ato mund të marinohen me verë dhe shurup dhe të piqen në grilë si dhe të bëhen reçel e të përdoren në tarta dhe torta.

Kumbulla

Kumbullat piqen plotësisht në fund të verës dhe i gjejmë në tregjet tona deri në Tetor. Ato kanë 60 kalori për 100 gr me vitamina A, B dhe C si dhe me minerale si Hekur, Kalcium, Magnez dhe Fosfor.

Si mund të përdoret ndryshe: Kumbullat mund t’i shtohen sallatave të ndryshme, mund të bëhen komposto dhe reçel si dhe përdoren gjerësisht edhe të thara.