GALAXY UNPACKED, Eventi
Javën që shkoi, Samsung prezantoi produktet e gjeneratës së re, në një event që zgjati më shumë se dy orë. Pak para fillimit të eventit kompania lajmëroi edhe për procesorin e ri Exynos W920. Ky është një processor modern i krijuar për të mundësuar performancë të avancuar për pajisjet të cilat do të operojnë me të. Kompania pretendon që ky është procesori më i fortë dhe më eficent qe ka krijuar deri tani me qëllim për të suportuar pajisjet gjithnjë e më të avancuara që ofrohen sot në treg.
Eventi filloi me prezantimin e Samsung Galaxy Watch 4. Siç mund të pritej, kjo orë mban procesorin e ri Exynos W920 por në të njëjtën kohë edhe sistemin operativ Google Wear OS 3. Një nga tiparet e reja të kësaj pajisje është aftësia për të regjistruar në mënyrë të saktë yndyrën e trupit, lëngjet, masën muskulare etj, vetëm duke prekur dy pozicione të veçanta në pjesën anësore të orës. Gjithashtu lëvizje specifike të dorës i lejojnë përdoruesve të ndërveprojnë me orën pa patur nevojë ta prekin atë.
Në vijim të eventit, Samsung zbuloi hapin e radhës në kategorinë e telefonave mobile e veçanërisht në atë të telefonave të përthyeshëm. Galaxy Z Fold 3, siç e thotë vetë emri, është modeli i tretë i radhës me tipare të reja në kategorinë e telefonave të përthyeshëm. Ky telefon ka dy ekrane 120hz, është 11 gram më i lehtë se paraardhësi i tij dhe lejon përdorimin e lapsit. Një tipar tjetër i rëndësishëm është fshehja e kamerës përballë në ekranin 7.6 “ në momentin që ekrani ndizet. Ky tipar do ti japë përdoruesit një eksperiencë të plotë të të parit pa asnjë pengesë. Qoftë Galaxy Z Fold 3 ashtu edhe Galaxy Z Flip 3 janë të certifikuar me IPX8 për rezistencën ndaj ujit dhe pluhurave.
Galaxy Z Flip 3 po ashtu është versioni i tretë i telefonit më të vogël të përthyeshëm që gjithashtu sjell disa teknologji të reja në këtë edicion. Ekrani i ri me ngjyra në pjesën e pasme të pajisjes i lejon përdoruesit që të bëjë fotografi, duke përdorur dy kamerat e avancuara pa patur nevojë që të hapë telefonin. Si Galaxy Z Fold 3 ashtu edhe Galaxy Z Flip 3 do të jenë në Neptun në datën 27 Gusht, por ndërkohë ka filluar faza e rezervimit gjatë të cilës mund të përfitoni ulje, benefite dhe dhurata.
Në fund prezantimi u mbyll me Galaxy Buds 2. Tipari më i rëndësishëm është kohëzgjatja e baterisë e cila lejon përdorimin e tyre për më shumë se 7 orë. Kufjet do të jenë të disponueshme në 4 ngjyra: të bardha, të zeza, ngjyrë ari dhe lejla.