Televizori më kompakt – LG OLED i rrotullueshëm
Ky është modeli që e dallon LG. Ju prezantojmë televizorin që zhduket. Ai rrotullohet në një kuti si të ishte një tub letre. Prototipi i këtij televizori me madhësi 65”, u prezantua për herë të parë në 2016 dhe tashmë është në treg me ekran 8K me 120HZ Refresh Rate. Për momentin gjendet vetëm në tregun Korean por shumë shpejt do të jetë prezent edhe në tregjet e tjera, përfshirë edhe Shqipërinë.
Mekanizimi është i thjeshtë: TV mblidhet brenda një kutie me bazë alumini, e cila shërben edhe si sistem zëri. Vetë kutia vjen me 4 ngjyra. Sapo fiket, TV mblidhet automatikisht brenda kësaj kutie, duke krijuar një ambjent të hapur dhe të lirë për syrin.
Ky televizor shpalos edhe një tjetër opsion i cili është Line View. Me këtë opsion, TV del vetëm pak nga kutia duke krijuar një bordurë të vogël me pjesën e sipërme të ekranit. Ajo mund të shërbejë si orë, si një impiant muzikor, menu e personalizuar apo edhe si ndriçim për të krijuar atmosferë në ambjentin tuaj. Aktualisht gjendet në treg me një vlerë 87.000 $ duke e bërë një nga TV më të shtrenjtë, por në të njëjtën kohë më unikun dhe më inovatorin.
LG Oled Wallpaper Samsung The Wall
Televizori më i hollë në botë
Më mirë të themi televizorët më të hollë në botë pasi janë tre modele:
-
Televizori OLED Wallpaper nga LG
Ky televizor është me plot gojën një perfeksion inxhinierik. Trashësia e tij arrin 3.85 mm, që është afërsisht sa trashësia e dy monedhave metalike të puthitura me njëra tjetrën. 8.3 milion pikselat që vetë-ndizen krijojnë ngjyra të gjalla, të zezën e errët të thellë dhe detaje të mprehta, për një eksperiencë të të parit TV njëlloj si në kinema. Këtij perfeksioni i është shtuar edhe AI ThinQ (inteligjenca artificiale) me Google Assistant, që do të thotë që pajisjet tuaja smart mund të lidhen me njëra-tjetrën, duke e shndërruar shtëpinë tuaj në një shtepi “të zgjuar”.
Duhet të përmendet që ky televizor vjen me një soundbar me Dolby Atmos audio me cilësi maksimale të zërit për një eksperiencë fantastike.
-
Televizori “The Wall” – MURI nga SAMSUNG
Pritet të jetë TV i parë modular në treg. Televizori do të formohet nga module panelesh të ndryshme, të cilat bashkohen me njëra-tjetrën, sipas madhësisë dhe rezolucionit që kërkoni ju vetë. Mundësitë për kombinim janë të shumta, deri në 292” me rezolucion 8K. Ky TV përdor teknologjinë Micro Led, e përafërt me atë OLED. Çmimet priten të jenë disa qindra mijëra dollarë.
-
Televizori “The Window” – DRITARJA nga SAMSUNG
The Window është një model 75”, i cili ofron rezolucion 4K, në versionin e tij më të vogël. Samsung thekson me krenari faktin se ky TV mund të riorganizohet në formate figurë të ndryshme, sipas dëshirës. Kjo gjë bëhet e mundur nga teknologjia e ndërtimit të ekranit nga panelet modulare, ashtu si te TV “The Wall”. Sa për çmimet do duhet të presim edhe pak pasi ato ende nuk janë publikuar nga Samsung.
Televizori më i madh në botë – Titan Zeus
Ky televizor prodhohet nga kompania britanike Titan dhe kushton 1.6 milion USD. Ai është 370”, ose për ta krahasuar ai ka përmasat e një porte futbolli. Pavarësisht përmasave marramendëse, TV ka nje rezolucion 4K UHD.
Televizori më i shtrenjtë në botë – PrestigeHD Supreme Rose Edition
Ky televizor kap vlerën e 2.2 mil $. Është një TV 55” i praruar me 28kg ar 18 karat. Korniza e tij është e zbukuruar me gurë Ametisti dhe Gur Dielli si dhe me 72 diamante me prerje perfekte, 1 karat secili. Sikur të mos mjaftonin këto, korniza e TV është e veshur me lëkurë krokodili të punuar me dorë.
Ju kë do zgjidhnit?