Neptun hedh hapin në vitin 2022 me investime të rëndësishme në logjistikë

Rritja e blerjeve online, zgjerimi i rrjetit të dyqaneve si dhe rritja organike e shitjeve kërkojnë një përgjigje të shpejtë për të përmbushur dhe tejkaluar pritshmëritë e klientëve tanë. Për këtë arsye do ta fillojmë vitin e ri 2022 me investime të rëndësishme në proceset logjistike.

 Në këtë drejtim drejtori ekzekutiv i Neptun Z. Alexandros Kosenas njoftoi dje se kompania Neptun ka nënshkruar një marrveshje paraprake me kompaninë “Milsped”. Kjo e fundit do të marrë përsipër të gjitha operacionet e magazinimit në qëndrën ekzistuese të shpërndarjes.

-“Kjo marrdhënie strategjike do të optimizojë aktivitetin në qëndrën tonë të shpërndarjes duke përmbushur standartet më të larta ndërkombëtare.” – theksoi Z. Kosenas.

Ajo që pritet është përmirësimi i sistemeve si dhe përshpejtimi i të gjitha veprimeve hyrëse dhe dalëse, në mënyrë që proceset e transportimit, magazinimit dhe shpërndarjes të kryhen me efektivitetin maksimal duke shkurtuar kohën e dërgimit të produkteve tek konsumatori. 

Aktiviteti logjistik i Neptun është i përqëndruar në një zonë prej 6000 m2 brenda mjediseve të Tirana Logistic Park, që është një investim i Balfin Group. Nga kjo pikë shpërndahen rreth 10.000 artikuj çdo ditë për të akomoduar nevojat e dyqaneve Neptun në të gjithë vendin, të dyqanit tonë online si dhe të partnerëve tanë e aktivitetit eksportues të kompanisë.