Netflix sjell abonimin e ri që përfshin reklama për një çmim më të lirë

Publikuar: Tetor 14, 2022

Netflix po shton reklama. Gjigandi i transmetimit do të sjellë një version të ri anëtarësie të mbështetur nga reklamat për 7 dollarë në muaj, të quajtur “Basic with Ads” në fillim të nëntorit në 12 vende.

Anëtarësimi i ri “Basic with Ads” do të shfaqet fillimisht në Kanada dhe Meksikë më 1 nëntor, më pas, ky nivel do të fillojë më 3 nëntor në SHBA, si dhe në Australi, Brazil, Francë, Gjermani, Itali, Japoni, Korenë e Jugut dhe Mretërinë e Bashkuar. Në fund, do të shfaqet në Spanjë më 10 nëntor.

Në këto vende, të gjitha abonimet aktuale të Netflix do të mbeten të pandryshuara, duke mos përfshirë rritje të çmimeve të tyre. Në një nga ndryshimet e vetme në opsionet ekzistuese për planin më të lirë pa reklama “Basic” që kushton 10 dollarë në muaj*, do të jetë shtimi i videove me cilësi 720p HD. Më parë, transmetimet me cilësi HD ishin të rezervuara vetëm për anëtarësimin “Standard” që kushton 15,5 dollarë në muaj. Tani, paketa “Standard” merr cilësi HD 1080p, ndërsa niveli “Premium” që kushton 20 dollarë në muaj ka akses në 4K dhe HDR. Paketa “Basic” e re me reklama do të ketë mesatarisht rreth katër deri në pesë minuta reklama në orë dhe nuk do t'i lejojë abonentët të shkarkojnë asgjë për ta parë offline. Niveli i mbështetur nga reklamat, gjithashtu, nuk do të ketë ndryshime të katalogut, por një numër "i kufizuar" i titujve nuk do të jetë i disponueshëm për t'u parë për shkak të kufizimeve ekzistuese të licencimit.

Për shumë vite Netflix hodhi poshtë idenë e reklamimit në shërbimin e tij. Por pasi humbi shumë anëtarësime në fillim të këtij viti, për herë të parë në një dekadë, kompania pati një qasje positive për reklamat. Shpresa e Netflix është që anëtarësimi më i lirë, të cilin e paguani më pak çdo muaj, por që fiton të ardhura nga reklamat që shikoni, do ta ndihmojë atë të rifitojë klientët.

Netflix po ndryshon diskursin e tij për shkak të konkurrencës në rritje. Në tre vitet e fundit, një e ashtuquajtur ‘luftë transmetimi’ ka sjellë një valë shërbimesh të reja, duke përfshirë Apple TV Plus, Disney Plus, HBO Max, Peacock dhe Paramount Plus. Pothuajse të gjitha kompanitë kryesore mediatike të Hollivudit kanë derdhur miliarda dollarë në programacionet e tyre të transmetimit, të gjitha duke ndjekur atë që dukej të ishte një rritje e pandalshme e abonentëve në Netflix. Kjo konkurrencë ka sjellë një “tërmet” që ka shkaktuar jo pak stres tregun që dikur ishte i padiskutueshëm për Netflix.

*Çmimet i referohen shërbimeve të Netflix në SHBA