Ndryshojnë emërtimet e klasit të energjisë për pajisjet elektronike. Ja se si është klasifikimi i ri prej Marsit 2021

Prej Marsit 2021 kanë hyrë në fuqi etiketat e reja për klasin e energjisë të cilat do mundësojnë që konsumatorët europianë të kuptojnë më mirë pajisjet e tyre përsa i përket energjisë që ato konsumojnë. 

Po pse është nevoja e etiketave të reja?

Etiketat e energjisë tregojnë se në cilën kategori të efiçencës energjitike një pajisje elektronike bën pjesë. Ky është një sistem i vlefshëm në të gjithë vendet e BE dhe shërben për ti ofruar konsumatorëve një informacion paraprak për efiçencën e pajisjeve që ata duan të blejnë. Gjithashtu ato mund të rrisin edhe ndërgjegjësimin, për ato pajisje të cilat janë më të mira në kuadrin e mbrojtjes së mjedisit. 

Sistemi që të gjithë njohim e që përdor emërtimet A+, A++ dhe A+++ është prezantuar në 1995. Megjithatë është vënë re se ky lloj kategorizimi ka sjellë konfuzion tek konsumatorët me kalimin e kohës. Kështu shumica e produkteve të reja ndahen në këto 3 kategori dhe nuk ka tjetër më poshtë se kaq. Kështu shumë konsumatorë besojnë se nëse marrin një produkt që ka klasin e energjisë A+, janë duke blerë një pajisje me efiçencë të lartë ndërkohë që kjo nuk është e vërtetë pasi kjo është kategoria e tretë dhe jo më e larta.   

Kur hyjnë në lojë etiketat e reja dhe për cilat pajisje do aplikohen ato?

Komisioni Europian ka aprovuar etiketat e reja të energjisë për disa kategori pajisjesh të cilat janë:

• Lavastoviljet
• Lavatriçet, dhe larëse-tharëset
• Frigoriferët
• Ekranet elektronik (televizorët, monitorët, ekranet digjitalë)
• Pajisje frigoriferike që përdoren për biznes.

Etiketat e reja kanë filluar të përdoren prej 1 Marsit 2021. Ndërkohë për pajisje të tjera si tharëse, furra dhe kondicionerë etiketat nuk do të ndryshojnë, të paktën në këtë fazë, por mund të ndryshojnë në të ardhmen. 

Cili është ndryshimi që do të ndodhë?

Ndarja në A+, A++, dhe A+++  nuk do të përdoret më (për kategoritë e pajisjeve të përmendura më sipër). Ato do të zëvendësohen me kategorizimin nga A-ja në G. Konsumatorët do të jenë të qartë që klasi i energjisë A është më i larti nga pikëpamja e efiçencës energjitike ndërkohë që G është më e ulta. Sistemi i ri lejon mjaftueshëm hapsirë për zhvillimet e reja teknologjike dhe për pajisjet që të rriten në shkallën e klasifikimit. 

Një risi tjetër është edhe “Eco Mode” i cili do të përdoret si një tregues për të matur konsumin, gjatësinë e programit, zhurmën dhe parametra të tjera për lavatriçet, lavastoviljet dhe larëse-tharëset. Konsumatori mund të përdorë këtë tregues për të krahasuar tipare të rëndësishme të pajisjeve të ndryshme sic tregohet më poshtë:

Sistemi i ri i etiketave të energjisë në BE do të mundësojë që konsumatorët të kenë një informacion më të qartë dhe të kuptojnë më mirë impaktin në energji të pajisjes që po blejnë. Nga ana tjetër edhe tek prodhuesit ky sistem i ri do ti vendosë para përgjegjësisë për të siguruar se produktet e tyre janë më efiçente nga pikëpamja e energjisë para se t’i hedhin ato në treg.